- Вечерва во белградска „Арена“ се спрема голем спектакл. Партизан го пречекува грчки Олимпијакос во 32. коло од Евролига и единствено со триумф ќе ги сочува пристојните шанси за пласман во плеј-ин како разигрување за плејофот.
- Познато е дека натпреварите на Партизан и Црвена звезда се магнет за многу луѓе од светот поради неверојатната атмосфера на нивните натпревари. Овојпат гости ќе им бидат и прославените кошаркари Тони Кукоч и Дино Раѓа.
- Во Белград ќе има и премиера на документарецот за Кукоч од босанскиот коментатор Сабахудин Топалбечиревиќ. „Неколку пати напоменав дека Партизан на градот Белград му носи многу приходи од ноќевања, сместување и друго од странците“, пред неколку дена изјави Жељко Обрадовиќ кој додаде дека му е исклучително драго што ќе има шанса да ги нагости Кукоч и Раѓа „со кои играл во репрезентацијата и против кои играл како играч на Партизан додека тие биле во Југопластика“.
- Македонските ракометни арбитри Славе Николов и Ѓорѓи Начевски се делегирани од ЕХФ за финалето на елитната Лига на шампиони. Николов и Начевски ќе го комплетираат неверојатниот круг со арибтража на финале на Светско првенство, Европско првенство, Олимписки Игри и Лига на шампиони.
- На Фајнал Форот во култната „Ланксес Арена“ во Келн за трофејот ќе се борат Магдебург - Алборг и Барселона - Кил. Победниците од полуфиналните дуели ќе играат во големото финале на 9. јуни од 18:00 часот.
- Грчкиот повеќекратен шампион игра чудесна сезона и се пласираше во финале на Лига Конференции, прво историско финале на еврокуп за клубот од Пиреја.
- За нивна среќа, финалето се игра во Атина, на новиот ултра-модерен стадион на АЕК. Противник ќе им биде Фиорентина, а УЕФА на двата клуба им распределила по 9.000 влезници. Иако е повеќе од јасно дека Олимпијакос лесно би можел да наполни три стадиони, а не еден за ова финале, управата на клубот помислила на најверните.
- Во осминафиналето Олимпијакос дома доживеа дебакл 1-4 против Макаби Тел Авив. Реваншот се играше во српскиот град Бачка Топола поради тоа што УЕФА не допушта одигрување натпревари во воена зона па Макаби беше домаќин во Србија а не во Израел.
- Речиси никој не верувал во чудо па само 49 навивачи на Олимпијакос допатувале на реваншот. Црвено-белите славеа 1-6 и се пласираа во следна фаза, а Олимпијакос сега ги наградува тие 49 души со карти за големото историско финале.