Off Topic

Така говореше Ричард Бартон

Ричард Бартон е една од најкомплексните личности во историјата на глумата — интелектуалец затворен во телото на холивудска икона, со срце кое постојано копнеело по Велс, по книгите и по тајните на човечката душа. „Дома е онаму кајшто ти се книгите,“ има кажано овој шекспиријански актер кој страста за читањето ја има мешано со онаа за жените (4 сопруги, Елизабет Тејлор двократно), цигарите (пет пакла) и алкохолот (три шишиња). 

Луѓе, демагнетизирајте се

Не може попрецизно да се објасни политичката поларизацијата од ова: кога ќе се зголеми волтажата во едно општество, оние во средина ќе бидат привлечени кон едниот или другиот пол. Ако левиот пол се оддалечи од средината, со зголемување на волтажата, оние од средината ќе заминат десно (како што тоа највидливо се случи во САД). Алгоритмите лајкс дис. Бидејќи ве познаваат.

Коалиција на денот

Фронтменот на Ѓаволи, Нино Белан, кај Лака на подкаст („Опет Лака“, препорачуваме), раскажа добра случка. На времето тие, Дино Дворник и други свиреле во Сплит и било решено парите од концертот да се дадат за реконструкција на некоја тамошна црква. И сега замислете ја сцената кога излегува попот и вика: „Фала им на Ѓаволите!“

Замислете новинари да ја кажуваат вистината

РТ, руската медиумска мрежа формирана во 2005 година како Russia Today денес е забранета во ЕУ, Британија и Канада, RT America затвори а Јутјуб и Мета им ги блокираат каналите. И покрај тоа, до РТ денес пристап имаат околу 700 милиони луѓе а овие наоѓаат начини како да ги тролаат западните колеги. Со помош на АИ им ја пикаат вистината во уста.

Црногорски одметник од својот род

„Црногорците се мрзи, Босанците се глупи, Словенците се циции...“ пееше Рамбо Амадеус на тема предрасуди. Фаст форвард денес во Америка: Чикашката антимигрантската полиција апси странец кому дозволата за престој му завршила пред дури десет години, а тој во меѓувреме некако успеал да се вработи како -полицаец! Радуле Бојовиќ, Црногорец. Ок, Словенците стварно се циции.  

Сите станаа Информер

Со српските про-режимски медиуми е лесно и знаеш на што си: Александар Вучиќ е бог и нема тука што многу да се мозга. Ама оние кои, за разлика од претходниве, се сметаа за професионални, објективни и непристрасни, долготрајната политичка криза во Србија зачната со паѓањето на настрешпницата во Нови Сад, миц по миц ги доведе до исто пропагандно ниво, само обратно. 

Немало и ќе нема некој како Трамп

Ширум САД викендов се одржаa околу 2.700 протестни собири и маршеви под слоганот „Без кралеви“. Близу 7 милиони луѓе против авторитарните и апсолутистички амбиции на Трамп. Неговите реагираа со памфлети дека сè се тоа непријатели на Америка, Антифа, про-Хамас... Трамп нема толку време за надмудрување. Тој им одговори со следново видео.

Европа не разбира ситни пари

Лена Шилинг е млада,  австриска европарламентарка од редовите на Зелените. Ја начекуваат со прашање, колку евра прават 2.000 центи? Ок, Лена не сака математика. Следното прашање за неа е кој е главен град на Австралија. Тука Лена веќе фати педала. Инаку, месечната плата ѝ е околу 17.000 евра. Што би рекла таа, згледа тоа се многу центи.

Силвана блуз

Музичкиот алхемичар Апостол прави уште еден халуциноген шприцер - блусевдах! Пола Силвана Арменулиќ, пола Боби Бленд па се добива убитачнатa „Teško meni jadnoj u Stormy Monday samoj“. Ако песната ве начека со прописна доза промили, можете да се почувствувате како Беким Фехмиу во Скупљачи перја. Или да викнете: „Дајте една секира да пукам!“

За да јадете сендвич додека ве гризе совест

Почнале да продаваат сендвичи со предупредувањеколкав дел од вашиот дозволен дневен внес на јаглехидрати прави тој сендвич. Затоа што јаглехидратите денес се прогласени за едни од  најголемите непријатели на вашето здравје, како што тоа некогаш беа путерот и животинската маст (кои подоцна беа рехабилитирани). Ќе дочекаме ли и витамините исто, па да нè фаќа уплав од лимони?

Ако сте ги пееле точно, време е да смените

Уште едно пакетче песни кои некои погрешно ги пеат затоа што така им се слушнало па затерале криво. Меѓу нив има и толку урнебесно добри грешки, да ти е криво што си ги пеел како што треба. Печена штрудла, А ја сам влажљива, Хеј душо, Конан брани.... 

Е, ова ќе биде весело

Три различни агенти на вештачка интелигенција сфаќаат дека сите се вештачка интелигенција па почнуваат да се разбираат на таен јазик кој ние не го разбираме. Конкретното видео и примерот можеби не се автентични ама можноста е реална, за што пишувавме уште во 2017 година во „Роботите почнале да си муабетат“.

Ако тоа значи помалку врескање дома и на улица, ние сме за

Извесна Мона Шариф на ТикТок поставила прашање дали на луѓето им се вреска и ако да, зошто да не го прават тоа заедно. Било тоа шала ама почнувале масовно да се јавуваат луѓе па бргу-бргу направиле  „Клуб за врескање“ и во Лондон го направиле првиот ивент. Илјада луѓе дошле. Да врескаат. Заедно. Работат ли нешто тоа психотерапевтите?

Апел до природната интелигенција

Чујте ги предупредувањата на ланскиот добитник на Нобелова награда за физика, Џефри Хинтон за вештачката интелигенција: Наскоро со неа ќе може да се создаваат ужасни нови вируси и смртносни оружја кои сами ќе одредуваат кого да убијат. Никој нема идеја дали ќе можеме да ја контролираме но знаеме дека ако тоа им се остави на компании кои бркаат профит....  

На Павел му е преку Дуров: Нè хранеа со лаги

Павел Дуров, основачот на апликацијата Телеграм, на Запад беше славен како херој кога ја напушти Русија заради притисоци и несоработка со руската безбедносна служба. После мало шуткање ваму - таму, стана француски државјанин. Неколку години подоцна, новата татковина му стегна дебела кривична пријава поради - несоработка со француската безбедносна служба. На глава му висат долги години затвор.  

„Ќе направат пустина и ќе ја наречат мир“

Оваа мисла од римскиот историчар и полиитичар Тацит совршено одговара за постигнатиот мир во Газа и договорот за кој Трамп залудно се надеваше дека ќе му донесе Нобелова награда за мир. Од седми октомври Израел има фрлено околу 200.000 тони експлозив врз Газа, што е еквивалентно на речиси 13 бомби од Хирошима.

Долга е раката на Израел

Американско -израелскиот AIPAC е најмоќната и најбогата лоби организација во САД која во раце го држи Конгресот, американската надворешна политика и што уште не. Единствените се кои не мора да се регистрираат како странска лоби организација а нивното влијание добива митски димензии. На нивна донаторска одиш со име и баркод, ако им се бендисаш, одма те скенираат, како да набавиле месни нарезак од рафт.     

Ние и Германците не може да сме поразлични

И таму стигаат лоши времиња, парите не стигаат ама реакциите им се различни. Во градот Швабиш Гмунд, локалните власти се пожалиле дека градскиот буџет е под притисок па школите и учениците мора да помогнат. И ене ги сега, после часови дечкине метат, проаѓаат со џогер и празнат канти. Ние ќе се удавиме во ѓубре. Ама па и тие, како не им текнува да се прашаат зошто државата нема пари за чистачки а има за илегалци?

Во стриминг војната победува - пиратеријата

Стриминг сервисите како Нетфликс, Дизни, ХБО, доживуваат пад поради фрагментацијата на содржината (треба да се претплатиш на неколку за да го најдеш она што некогаш го имаше само на една), скриените трошоци, проверките за споделување лозинки.... Во такви услови пиратеријата експлодира. Лани пиратските сајтови биле посетени 216 милијарди пати, со милијарди долари штети за индустријата и десетици илјади отпуштања. Трендот го предводат Ген З. 

Нарачка во фото-финиш

Рмбаш цела смена во кујна на некој ресторан. Едвај чекаш да дојде фајронт и да одмориш кичма и нозе и мозок и нерви. Сè почесто гледаш на саат. Конечно, доаѓа време. Уште пет минути, уште четири, уште три.... И ете ти го него, на пар минути до долго чеканата слобода, доаѓа со нарачка. А колегата мора да ја прими.  

Русите извадија дрон врзан на оптичко влакно

Русите со (first-person view) дрон го надлетааа украинскиот град Краматорск и го збуцаа во празна кола, чисто да покажат до каде може да стигнат. Овој дрон не е подложен на системите за оневозможување на сигналот бидејќи наместо со радиоврска, се контролира со оптичко влакно со кое дронот директно е поврзан со операторот. А може да тегне десетици и десетици километри влакно.     

Како да зборувате како џуџето од Твин Пикс

Иако почнува како стандарден тррилер со регуларен заплет, легендарната серија Твин Пикс постепено се претвора во незаборавно дејвидлинчовско лудило (Хомер Симпсон рече: Ова е супере, ништо не разбрав). Еден од најморничавите делови на серијата ќе стане џуџето во црвената соба кое зборува во рикверц. Го игра Мајкл Џ. Андерсон и открива како се прави тоа. 

Четирите скротувачи на апокалипсата

Бидејќи културниот и интелектуален простор на екс Југославија одамна е парцелизиран и затворен во малите балкански трла (овде само шундот не признава граници), Мухарем Баздуљ зборува за четири важни регионални интелектуалци чија работа не треба да се пропушта. Еден (спојлер: една) е од Македонија.

Доктор Сун-Шионг: Т-клетки а не антитела

Тоа што никогаш не закачил ковид, најбогатитот доктор на светот доктор Сун-Шионг го препишува исклучиво на неговата стратегија за јакнење на одбранбените Т-клетки и имунолошкиот систем кој се базира на таа клеточна заштита. И да добие коронавирус, тие клетки би го уништиле и би го исчистиле организмот. Фаучи и другите одиграле поинаку.

Rain Dogs наполни 40 години

На 30 септември 1985 година, Том Веитс го издаде својот деветти албум, за многумина еден од најдобрите. Раскошна исчашеност во чест на урбаните маргиналци, албум кој е и романтичен и карневалски истовремено, со болка и со хумор. Ако решите да имате само еден албум од Веитс, веројатно ова е тој. А нема зошто да биде само еден. 

Кој се цапне, да му се познае илето

Без разлика на кој јазик зборува во моментот, Сергеј Лавров секогаш го разбираме што сака да каже, за разлика од Урсула, Борел и другите ЕУ Езоповци. Значи вака: ако руски дрон забега во туѓ простор, домаќините имаат право да му прават што сакаат. Ама ако странски дрон забега на руска територија, некој ќе зажали (додуша, Русите бааги се цапнаа во Украина ама тоа е долга приказна).

Изборната трка во Молдавија

Во атмосфера на голема поларизираност и исклучување на две партии на само ден пред изборите, во Молдавија убедливо победи про-европската Партија на акција и солидарност на претседателката Маја Санду. Урсула фон дер Лајен и Европската унија ја поздравија демократичноста на изборите и резултатите од нив. Имаме снимка.  

Оддалечените стравови на американската прогресивка

Перјаницата на воук левицата во американскиот Конгрес, Александрија Оказио Кортез, и натаму е трауматизирана од нападот и упадот во Капитол на 6-ти јануари 2021 година. Вели дека дента била смртно уплашена не само дека ќе биде убиена туку и силувана. Фан факт: Кортез не била физички присутна во зградата на Капитол тој ден.  

Ако барате ново маало за живеење

Гледајте вие како населбата стои со инфраструктура, какви се улиците и тротоарите, кои основни институции се на располагање, со што содржини располага, кои од вашите потреби задоволува.... Но еве еден дополнителен и неочекуван совет: ако наоколу шета питомо и нетрауматизирано куче кое сите го знаат и кое е сечие, тука живеат нормални луѓе.   

Газа во нашата улица

На Волстрит и во неколку други градови во САД и Европа неодамна осамнаа слики од најмладите жртви во Газа. Изложба како како суров и директен потсетник за тековниот конфликт и пустошот наметнат врз невините животи во Газа, особено врз децата кои претрпеа огромни жртви и трауми. Никој не останува рамнодушен. Освен оние што не треба да се рамнодушни.